Protektahan an Namamanwaan; Depensahan an Republika

Magbangkay kamo, namamanwaan kan Pilipinas!

Sana ngani, nagbabangkay an mga tawo o kaya nagbabaga an anggot dahil sa ibinabang resolusyon kan Ombudsman manongod sa anomalya sa pagbakal kan mga ‘automated counting machines’. Alagad aram kong pangatorogan sana ini dahil an pagrarom nin kaaraman kan mga tawo sa politika kabaliktadan kan paglakop nin pagtios.

Asin dahil habo kong nangangaturugan sana, bayae na ihiras ko an mga katotohanan na nagliwanag sa pagbaba kan resolusyon kan Ombudsman.

Mag-ogma kamo, namamanwaan kan Republika! Hilinga nindo an pagbuswak kan republika dawa pa nagriribok an oposisyon.

Tama, sarong bagong republika an nagtatalubo. Sarong republikang an mga poderosong mamamanwaan iyo an nagkokontrol kan mga demokratikong institusyon. Nabibilog an pusog na republika, pasaro-sarong lakdang, sa paaging mayong paltos. Gabos na importanteng institusyon minauyon sa Palasyo, an sentro kan pusog na republika.

Ipinahiling sato kan iskandalo ni Garci an COMELEC na tultol na nagseserbisyo sa republika. Mayo nin reklamo para sa impeachment an nuarin man makakalusot sa Kongreso ta inaataman kaini an interes kan republika. An mga kabukidan dinudugdog nin dugo kan siisay man na magporbar na lumaban sa mga nakatukaw. Dai na kaipuhan pang magpagal ang pulis saka militar; an mga misteryosong garadanan gibo kan mga rebelde.

Sa ngonian, nahiling ta pa ang Ombudsman na kayang gumibo nin mga ngangalasan tangani na pangatamanan an mga namamanwaan kan pusog na republika asin surugon an mga naghahadi laban sa mga nakakaraot na balubagi asin prosekusyon kan mga tawong gustong raoton an dignidad asin maray na ngaran kan mga ginagalangan na mga lideres.

An siisay man na makontra sa Republika dapat panaguton sa pataw na padusa kan ley. Itao sa mga suportadores kan republika ang pinakadarakulang kontrata sa gobyerno. Ini an prinsipyong nagdadalagan sa puso asin isip kan mga namamanwaan sa bagong republika. Ini ang nagbubugkos asin nagpapapusog sa mga institusyon asin nagsisigurong an bilog na makinarya nin gobyerno nagtatrabaho para sa mga namamanwaan.

Kaya ano ta magduda sa resolusyon kan Ombudsman samantalang pinapangatamanan sana kaini an MGA tawo ni GMA asin dinedepensahan an saiyang pusog na Republika?

Malaban ka?